କ୍ରାନ୍ତିଖଡୁ ନ୍ୟୁଜ‐ଆଶା କର୍ମୀ ନିଖୋଜ (ଏନ.ରବିଙ୍କ ରିପୋର୍ଟ) ପଡିଆ: ମାଲକାନଗିରି ଜିଲ୍ଲା ପଡ଼ିଆ ଥାନା ଅନ୍ତର୍ଗତ କତାଗୁଡ଼ା ଗ୍ରାମର ଜଣେ ମହିଳା ନିଖୋଜ ହୋଇଥିବା ନେଇ ଥାନାରେ ଅଭିଯୋଗ ହୋଇଛି । ନିଖୋଜ ମହିଳା ସ୍ଵପ୍ନା ବାୟା ପଡ଼ିଆ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅନ୍ତର୍ଗତ ସିଙ୍ଗାନି ଗୁଡା ଗ୍ରାମରେ ଆଶା କର୍ମୀ ଭାବେ କାର୍ଯ୍ୟରତ ଥିବା ଜଣାପଡ଼ିଛି । ଏନେଇ ପଡ଼ିଆ ଥାନାରେ ଏକ ଏମ୍ଏମ୍ଆର ଦାଖଲ କରି ନିଖୋଜ ମହିଳାଙ୍କୁ ଖୋଜିବାକୁ ଉଦ୍ୟମ ଜାରି ରହିଛି ବୋଲି ଥାନା ଅଧିକାରୀ ପ୍ରଶାନ୍ତ କୁମାର ନିଶିକା ସୂଚନା ଦେଇଛନ୍ତି । ସୂଚନା ଅନୁଯାୟୀ, ଗତ ୩ ତାରିଖ ଅପରାହ୍ନ ପ୍ରାୟ ୩ଟା ସମୟରେ ସ୍ଵପ୍ନା ଜଣେ ଗର୍ଭବତୀଙ୍କୁ ମାଲକାନଗିରି ନେବାକୁ କହି ଘରୁ ବାହାରିଥିଲେ । ହେଲେ ସନ୍ଧ୍ୟା ହୋଇଯିବା ପରେ ମଧ୍ୟ ସେ ଘରକୁ ନ ଫେରିବାରୁ ତାଙ୍କ ସ୍ୱାମୀ ଜଗଦୀଶ ବାୟା ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ । ଦୁଇ ତିନି ଦିନ ଧରି ଏଣେତେଣେ ଖୋଜାଖୋଜି କରିବା ସହ ସ୍ଵପ୍ନାଙ୍କ ମୋବାଇଲ ଫୋନ ମଧ୍ୟ ସୁଇଚ୍ ଅଫ୍ ଥିବାରୁ ଶେଷରେ ପରିବାର ଲୋକ ପଡ଼ିଆ ଥାନାରେ ଲିଖିତ ଅଭିଯୋଗ କରିଥିଲେ । ନିଖୋଜ ସ୍ୱପ୍ନାଙ୍କର ଗୋଟିଏ ୫ ବର୍ଷର ଝିଅ ଥିବା ଜଣାପଡ଼ିଛି ।