kranti khadu news-ଟ୍ରାକ୍ଟର ଚାପି ହୋଇ ଜୀବନ ଗଲା, ଅଗ୍ନିଶମ ବିଭାଗ କଲା ଉଦ୍ଧାରପଡ଼ିଆ: ( ଏନ୍ ରବିଙ୍କ ରିପୋର୍ଟ) ନିଜ ଚାଷ ଜମିରେ ଟ୍ରାକଟର ସାହାଯ୍ୟରେ ଚାଷ କରୁଥିବା ବେଳେ ଟ୍ରାକ୍ଟର ଟି ଭାରସାମ୍ୟ ହରାଇ ଚାପି ହୋଇଯାଇଥିଲା ଚାଷୀ ଉପରେ। କେଇ କ୍ଷଣ ଛଟପଟ ଓ ଚିତ୍କାର ପରେ ଚାଲିଗଲା ଚାଷୀର ଜୀବନ। ଏଭଳି ଏକ ମର୍ମନ୍ତୁଦ ଘଟଣା ଦେଖିବାକୁ ମିଳିଛି ମାଲକାନଗିରି ଜିଲ୍ଲା ପଡିଆ ବ୍ଲକ କାଲଦାପଲ୍ଲୀ ପଞ୍ଚାୟତ ଅନ୍ତର୍ଗତ ଏମଭି ୫୯ ଗ୍ରାମରେ । ସୂଚନା ମୁତାବକ ଆଜି ସକାଳ ପ୍ରାୟ ୧୦ ଟା ବେଳେ ଏହି ଗ୍ରାମର ତପନ ଢାଲି ନାମକ ଜଣେ ଚାଷୀ ନିଜର ଚାଷ ଜମିରେ ଟ୍ରାକ୍ଟର ସାହାଯ୍ୟରେ ଚାଷ କରୁଥିଲେ। ଖାଲଢେପ ଭରା ଏହି ଜମିରେ ଚାଷ କରୁଥିବା ବେଳେ ହଠାତ୍ ଟ୍ରାକ୍ଟର ଭାରସାମ୍ୟ ହରାଇ ତପନ ଙ୍କ ଉପରେ ଚାପି ହୋଇଯାଇଥିଲା। ଏତିକି ବେଳେ ତପନ ଜୋର୍ ରେ ଚିତ୍କାର କରିବା ସହ କେଇ କ୍ଷଣ ଛଟପଟ ହୋଇ ଜୀବନ ହରାଇ ଥିଲେ। ଚିତ୍କାର ଶୁଣି କିଛି ଦୂରରେ ଥିବା ଚାଷୀ ଓ ତପନ ର ଭାଇ ରତନ ଘଟଣା ସ୍ଥଳରେ ପହଞ୍ଚି ପଡିଆ ଅଗ୍ନିଶମ ବିଭାଗକୁ ଖବର ଦେଇଥିଲା। ଖବର ପାଇ ଅଗ୍ନିଶମ ଅଧିକାରୀ ଶିଶିରକାନ୍ତ ସିଂ ଏକ ଅଗ୍ନିଶମ ଟିମ୍ ସହ ତୁରନ୍ତ ଘଟଣା ସ୍ଥଳରେ ପହଞ୍ଚି ଟ୍ରାକ୍ଟର ତଳେ ଚାପି ହୋଇ ରହିଥିବା ତପନ କୁ ଉଦ୍ଧାର କରିବା ପରେ ପଡିଆ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର କୁ ନେଇ ଚିକିତ୍ସା କରାଇଥିଲେ । ତେବେ ସେଠାରେ ଡ଼ାକ୍ତର ତପନ କୁ ମୃତ ଘୋଷଣା କରିଥିଲେ। ଏହାପରେ ପରିବାର ଲୋକ ପଡିଆ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ମୃତ ତପନ ର ଶବ ଜବତ କରି କାଲିମେଳା ରେ ବ୍ୟବଚ୍ଛେଦ କରାଇବା ପରେ ପୁଣି ପରିବାର ଙ୍କୁ ହସ୍ତାନ୍ତର କରିଥିଲେ। ଏ ନେଇ ପଡିଆ ଥାନାରେ ଏକ ମାମଲା ରୁଜୁ କରାଯାଇ ଘଟଣାର ତଦନ୍ତ ଚାଲିଥିବା ପଡିଆ ଥାନା ଅଧିକାରୀ ପ୍ରଶାନ୍ତ କୁମାର ନିଶିକା କହିଛନ୍ତି।